Air Greenland ikiuuttarpoq

Angalanerup nalaani - aallalernermilu, issiavimmik kaassuartakkamut.

Allakkiaq ataaniittoq Air Greenlandip, IPIS-imut innarluutillit angalanerminni periarfissarisartagaanut tunngasumut apeqqutigisaanut, akissutigaa.


Timmisartumukarnermi /-miillu, taamaattumilu ilaasunut nikippiarsinnaanngitsunut ikiugassanullu, soorlu issiavinnik kaassuartakkanik, Air Greenland ikiuussinnaavoq.

Ilaasoq nikissinnaanngivissoq kaammattorneqarpoq, angalanermini ikiortigisinnaasaminik ingiaqateqaqqullugu. Inuit timimikkut innarluutillit (WCHC), timmisartumilu aatsaat ikiorneqaqqaarlutik perusuersarsinnaasut, imaluunniit ajornartorsiulernermi anniffissamukarsinnaasut tassani pineqarput.

Ilaasussat aallalernerminni issiavimmik kaassuartakkamik nassarsinnaapput. Tassanittaaq pineqarput Peqqinnissaqarfimmit akiliunneqarlutik angalasut. Napparsimasut katsorsartikkiartortut angerlartulluunniit Peqqinnissaqarfimmit issiavimmik kaassuartakkamik atortulikkat.

Kaassuartakkamik issiavilerneqarnissamik, ikilernermilu niulernermilu ikiorneqarnissamik, tamanna angalanissamik inniminniinermi pissaaq. Taamaaliortoqassaarlu kodet inniminniinermiittut atorlugit. Ilaasussaq nammineq kaassuartakkamik issiaveqareeruni, kaassuartagaa inniminniissutaassaartaaq. Inniminniinermi kaassuartagaq XBAG-itut nalunaarsorsimassaaq, taamatuttaarlu angissusaa, oqimaassusaa, sumukarneq, ilaasussallu kiunera.

Issiavimmik kaassuartakkamik nammineq nassarnissamut akuersissut Agentservicemit tunniunneqassaaq, inniminniinermilu takuneqarsinnaassaaq.
Isigiarsuttoq tappiitsorluunniit ingiaqateqanngitsoq, ilaaniartorluunniit tusilartoq, aallalernermi ikiorneqarnissamik pisariaqartitsippat kissaateqarpalluunniit, suliffeqarfimmi sulisut ikiuutissapput.

Isigiarsuttup/tappiitsup, tusilartulluunniit qimmini ingiallortini akeqanngitsumik timmisartoqatigisinnaavaa. Qimmeq ingiallortigisaq inniminniinermi inniminnerneqartuaannassaaq. Paasisaqarnerorusukkaanni Agentservice attavigineqassaaq.

Isigiarsuttoq/tappiitsoq angalanermi ingiallorteqarsinnaavoq, taanna timmisartulinnginnermi, timmisartornermi, timmisartoreernermilu, illersorneqarsinnaasumik ingiallorteqanngippat.

Tappiitsup ingiallortaannut bilitsimut 100%-mik akikilliliisoqartarpoq. Taamaaliortoqarnissaani Dansk Blindesamfund-ip qullersaqarfianeersumik, inersimasumik isigisinnaasumik ingiaqateqarsinnaanermut pisinnaatitsissummik upernarsaammik, peqartoqassaaq. Allaffissornermut tunngassuteqartumik akiliisoqassaaq, timmisartoqarfimmullu tunngasumik akiliisoqassalluni. Tappiitsunut ingiallorteqarnissamik inniminniineq, Agentservicemit imaluunniit Agentservice peqatigalugu, pissaaq.

Ilaasoq tappiitsuullunilu tusilartuuppat, taanna pisinnaanngivissutut taaneqarpoq - ingiallorteqaqqaarluni angalasussaq.

Qulaani allagaq, Air Greenlandimit akissutaavoq IPIS-imit apeqquteqaammut. IPIS-i innarluutilinnut pikkorissartitsinernut aaqqissuisarami paaserusuppaa, Air Greenland-i sorpianik ikiuuttarnersoq ikiuuttannginnersorluunniit. Apeqquteqartup, IPIS-imi siunnersortip Jane Justsen-ip apeqqutigaa, tappiitsunut isigiarsuttunullu timmisartuni ilaasunut tunngassuteqartoq.

Apeqqut: "...allanik patsiseqarlutik ikiorneqarnissamik pisariaqartitsisut".Uani, soorlu tappiitsut isigiarsuttullu pineqarpat?