PISSASSARFIK sunaana

Pissassarfik nuna tamakkerlugu innarluutilinnik sullissiviuvoq Sisimiuniittoq.

Pissassarfimmi neqeroorutit meeqqanut, inuusuttunut inersimasunullu innarluutilinnut, innarluutilinnut qanigisaasunut sulisunullu innarluutilinnik suliaqartunut saaffiginnipput.

Pissassarfiup neqeroorutigisarpai suliamut tunngatillugu ilitsersuineq, siunnersuineq, qulaajaaneq, ilinniartitsineq, pikkorissarnerit aamma timikkut, tarnikkut, oqalunniarnikkut eqqarsartaatsikullu innarluutilinnut naleqqiullugu katsorsaanerit sungiusaanerillu.

Pissassarfimmi immikkut ilisimasallit arlallit suleqatigiipput:

- Fysioterapeuti

- Oqallorissaasoq

- Psykologi

- Ergoterapeuti

- Isumaginninnermi perorsaasoq

- Isumaginninnermi siunnersorti

Tamatumuuna periarfissinneqarput suliat akimorlugit ataatsimoortumillu isiginneriaaseqarluni sullissinissat, ilisimasanik inerisaaneq aamma ilisimasanik avitseqatigiinneq.

Pissassarfiup siunertaraa innuttaasut innarluutillit inuunermikkut atugarissaarnerisa isumaqarluartumillu inuuneqarnissamut periarfissaasa pitsanngorsarnissaat.

Pissassarfimmi tunngaviuvoq ingerlatsinermi sumiluunniit innuttaasup ulluinnarisaanik aallaaveqarlunilu piviusunngortitsiniarnissaq. Taamaammat ingerlatsinerup ingerlaavartinnissaa malitseqartinnissaalu arlalitsigut pisariaqartassaaq.